सार्वजनिक विवरणअनुसार वाग्लेको काठमाडौँको चन्द्रागिरीमा ३ रोपनी, ललितपुरको सानेपामा ३.७५ आना र भैसेपाटीमा ४ आना जग्गा रहेको छ। यसबाहेक धुलिखेल, बन्दीपुर, गोरखाको शहीद लखन तथा गोरखा नगरपालिका, चितवनको रत्ननगर र तनहुँको भानु नगरपालिकामा समेत उनको जग्गा रहेको उल्लेख गरिएको छ।
सम्पत्ति विवरणमा उनीसँग ४५ तोला सुन रहेको देखिएको छ, जसलाई पारिवारिक स्रोत र रोजगारीबाट आर्जित भनिएको छ। साथै, विभिन्न कम्पनीहरूमा गरी करिब १ करोड ९० लाख रुपैयाँ नगद तथा लगानी रहेको उल्लेख छ।
त्यस्तै, सांग्रीला डेभलपमेन्ट बैंक र सानिमा मिडिल तमोर हाइड्रोपावरमा गरी झण्डै १ लाख कित्ता प्रमोटर सेयर रहेको छ भने अन्य करिब ५ करोड ५० लाख रुपैयाँ बराबरको शेयर लगानी पनि रहेको देखिन्छ।
सवारी साधनतर्फ उनले करिब ९४ लाख रुपैयाँ मूल्य पर्ने ‘सुवानु एसभी’ गाडी पनि स्वामित्वमा राखेको विवरणमा उल्लेख गरिएको छ।
